बिश्वास सिलवाल ,धादिङ ,२० भाद्र ,२०८३
धादिङको गल्छी गाउँपालिका–२, बेलीन्टारमा त्रिशूली नदीले तीव्र रूपमा कटान गर्न थालेपछि नदी किनार आसपासको बस्ती जोखिममा परेको छ। पछिल्ला दिनमा नदीको बहाव बढेसँगै नदीले आफ्नो धार परिवर्तन गर्दै किनारतर्फ कटान तीव्र बनाएको हो।
नदीले निरन्तर जमिन कटान गर्न थालेपछि बेलीन्टार क्षेत्रका स्थानीय बासिन्दामा त्रास बढेको छ। नदीको बहाव नजिकिँदै जाँदा बस्ती आसपासको जमिनसमेत कटानमा पर्न थालेपछि स्थानीयले तत्काल जोखिम न्यूनीकरणका लागि सम्बन्धित निकायको ध्यानाकर्षण गराएको आदमघाटबाट सुसान खतिवडाले जानकारी दिनु भयो ।
केही दिनअघि आएको भीषण बाढीपछि त्रिशूली नदीमा आएको परिवर्तनले धादिङका विभिन्न नदी तटीय क्षेत्रमा जोखिम बढाएको छ। गल्छी क्षेत्रमा यसअघि पनि नदीको धार परिवर्तन भएपछि बस्ती तथा घरतर्फ कटान बढेको र केही घरसमेत क्षतिग्रस्त भएको विवरण सार्वजनिक भएका छन्।
बेलीन्टारमा पनि नदीको कटान यही गतिमा अघि बढ्दै गएमा थप घर तथा भौतिक संरचना जोखिममा पर्न सक्ने स्थानीयको भनाइ छ। नदीले जमिन कटान गरिरहेको क्षेत्रमा तत्काल तटबन्ध, ग्याबियन जाली तथा अन्य आवश्यक संरक्षणका उपाय अपनाउनुपर्ने माग स्थानीयले गरेका छन्।
नदी किनारमा बसोबास गर्ने परिवारहरू सम्भावित जोखिमलाई लिएर चिन्तित बनेका छन्। रातको समयमा नदीको बहाव बढ्ने अवस्था आएमा थप क्षति हुनसक्ने भन्दै स्थानीयले सतर्कता अपनाउन थालेका छन्।
स्थानीय तह तथा सम्बन्धित सुरक्षा निकायले नदीको बहाव र कटानको अवस्था निरन्तर निगरानीमा राख्नुपर्ने देखिएको छ। जोखिममा रहेका परिवारलाई आवश्यक परे सुरक्षित स्थानमा सार्ने तयारीसँगै तत्काल कटान रोक्ने अस्थायी उपाय अघि बढाउनुपर्ने आवश्यकता देखिएको छ।
बाढीपछि त्रिशूली नदी आसपासका क्षेत्रमा जोखिम अझै कायम रहेकाले नदी किनारका बस्तीका बासिन्दालाई सावधानी अपनाउन र नदीको बहाव तथा कटानको अवस्थाबारे स्थानीय प्रशासनबाट जारी हुने सूचनालाई ध्यान दिन आग्रह गरिएको छ।
बेलीन्टारमा देखिएको पछिल्लो अवस्थाले बाढी सकिएपछि पनि नदीजन्य जोखिम तत्काल समाप्त नहुने देखाएको छ। त्यसैले सम्भावित ठूलो क्षति हुनुअघि नै जोखिमयुक्त क्षेत्रमा दीर्घकालीन तट संरक्षण तथा बस्ती सुरक्षाको योजना बनाउन आवश्यक देखिएको छ।
