अरुण पौडेल
अष्ट्रेलिया , क्यानबेरा 26 January 2026
आज अष्ट्रेलियामा राष्ट्रिय पर्व अष्ट्रेलिया डे मनाइँदै छ। यस अवसरमा देशभर सार्वजनिक बिदा दिइएको छ भने विभिन्न औपचारिक कार्यक्रम, नागरिकता प्रदान समारोह तथा सांस्कृतिक गतिविधिहरू आयोजना गरिएका छन्।
अष्ट्रेलिया डे को अवसरमा नयाँ नागरिकलाई अष्ट्रेलियन परिवारमा स्वागत गर्नु सबैभन्दा अर्थपूर्ण कार्यहरूमध्ये एक भएको अष्ट्रेलियाका प्रधानमन्त्री एन्थोनी अल्बानीजले बताएका छन्।
प्रधानमन्त्री अल्बानीजले आज माइकल ओडुटोला र उहाँको परिवारसँग भेटघाट गरेका छन्। माइकल क्यान्सरसम्बन्धी अनुसन्धानमा योगदान दिन अष्ट्रेलिया आएका हुन्। उनको अनुसन्धान कार्यले समुदायका धेरै मानिसहरूको जीवन सुधार गर्न सहयोग गरिरहेको प्रधानमन्त्रीले उल्लेख गरे।
“माइकलजस्ता व्यक्तिहरू र ओडुटोला परिवारजस्ता परिवारहरू नै अष्ट्रेलियालाई बलियो, विविधतायुक्त र सम्भावनाले भरिपूर्ण देश बनाउने आधार हुन्,” प्रधानमन्त्री अल्बानीजले भने।
प्रधानमन्त्रीले नयाँ नागरिकलाई बधाई दिँदै अष्ट्रेलियामा स्वागत गर्दै भने, “बधाई छ, र घरमा स्वागत छ।”
तर, अष्ट्रेलिया दिवसलाई लिएर आदिवासी (First Nations) समुदायको असहमति भने अझै कायम रहेको छ। आदिवासी समुदायले जनवरी २६ लाई उत्सवको दिनभन्दा पनि आफ्नो भूमि, संस्कृति र अधिकार खोसिएको ऐतिहासिक दिनका रूपमा सम्झिँदै आएका छन्।
आदिवासी नेताहरूले यस दिनलाई “Invasion Day” वा “Day of Mourning” का रूपमा व्याख्या गर्दै राष्ट्रिय दिवसको मिति परिवर्तन गर्नुपर्ने माग गर्दै आएका छन्। उनीहरूको भनाइमा, साँचो राष्ट्रिय एकता तब मात्र सम्भव हुन्छ जब आदिवासी समुदायको इतिहास, पीडा र अधिकारलाई औपचारिक रूपमा स्वीकार गरिन्छ।
यस अवसरमा आज विभिन्न सहरहरूमा आदिवासी अधिकारको पक्षमा शान्तिपूर्ण प्रदर्शन तथा र्यालीहरू समेत आयोजना गरिएका छन्।
अष्ट्रेलिया दिवसले एकातर्फ नयाँ नागरिकता, आप्रवासी योगदान र राष्ट्रिय पहिचानको उत्सव झल्काउँछ भने अर्कोतर्फ आदिवासी समुदायको ऐतिहासिक पीडा र अधिकारसम्बन्धी बहसलाई पुनः सतहमा ल्याएको छ।
