धादिङ । आगामी २०८२ फागुन २१ गते हुने प्रतिनिधिसभा सदस्य निर्वाचनलाई शान्तिपूर्ण, मर्यादित र निष्पक्ष रूपमा सम्पन्न गराउने उद्देश्यले धादिङ जिल्लामा क्रियाशील प्रमुख राजनीतिक दलका जिल्ला नेतृत्व र दुबै क्षेत्रका उम्मेदवारहरूबीच समन्वय बैठक सम्पन्न भएको छ।
नेपाली कांग्रेस धादिङको समन्वयमा मंगलबार बिहान धादिङबेसीमा बसेको बैठकमा नेपाली कांग्रेस, नेकपा एमाले, नेपाली कम्युनिष्ट पार्टी, राष्ट्रिय स्वतन्त्र पार्टी र राष्ट्रिय प्रजातन्त्र पार्टीका जिल्ला प्रमुख तथा प्रतिनिधिसभा क्षेत्र नं. १ र २ का उम्मेदवारहरूको सहभागिता रहेको थियो।
बैठकले धादिङ जिल्लामा निर्वाचनलाई शान्ति, अमनचयन र राजनीतिक–सामाजिक सद्भावका साथ सम्पन्न गर्ने साझा प्रतिबद्धता व्यक्त गरेको छ। सहभागी दल र उम्मेदवारहरूले जुनसुकै पार्टी वा व्यक्ति निर्वाचित भए पनि सन्तुलित तथा न्यायपूर्ण विकास, सुशासन, समतामूलक समाज निर्माण र सबै खालका विभेदको अन्त्यका लागि आपसी सहयोग र समन्वय गर्ने सहमति जनाएका छन्।
त्यसैगरी, निर्वाचन प्रचारप्रसारका गतिविधिहरूलाई शान्तिपूर्ण, सौहार्दपूर्ण, मैत्रीपूर्ण, मितव्ययी र मर्यादित बनाउने, मतदान प्रक्रियालाई स्वतन्त्र र निष्पक्ष राख्ने तथा सबै राजनीतिक दल र उम्मेदवारप्रति आदर र सम्मान कायम गर्ने प्रतिबद्धता गरिएको छ।
बैठकमा निर्वाचनका क्रममा उत्पन्न हुन सक्ने कुनै पनि विवाद वा असमझदारीलाई आपसी संवाद र समन्वयमार्फत समाधान गर्ने सहमति समेत भएको छ। साथै, निर्वाचन आयोगले जारी गरेको निर्वाचन आचारसंहिता, २०८२ को पूर्ण पालना गर्ने र गराउने प्रतिबद्धता सहभागी सबै पक्षले व्यक्त गरेका छन्।
सहमतिको प्रभावकारी कार्यान्वयनका लागि सरकार, निर्वाचन आयोग, राजनीतिक दल, उम्मेदवार, कार्यकर्ता, मतदाता, आम नागरिक तथा सञ्चारकर्मीहरूलाई सहयोग, निगरानी र खबरदारी गर्न हार्दिक अनुरोध गरिएको छ।
नेपाली कांग्रेस धादिङको अगुवाइमा सम्पन्न उक्त समन्वय बैठकलाई जिल्लामा शान्तिपूर्ण निर्वाचन वातावरण निर्माणतर्फको सकारात्मक पहल का रूपमा हेरिएको छ।
