………………………………
शून्यमा काँग्रेस : अधिवेशन नै भएन, संकट झन् गहिरिँदै
| १.नेपाली काँग्रेसको १५औँ महाधिवेशन प्रक्रिया वडा अधिवेशन नै हुन नसक्दा पूर्ण रूपमा ठप्प भएको छ। २.क्रियाशील सदस्यता विवाद र नेतृत्वको असफलताले संगठन शून्य अवस्थामा पुगेको देखिन्छ। ३.अधिवेशन बिना नै फागुनको निर्वाचनतर्फ धकेलिँदा काँग्रेसको राजनीतिक भविष्य थप अन्योलमा परेको छ। |
नेपाली काँग्रेस पछिल्लो समय संगठनात्मक रूपमा गम्भीर संकटमा पुगेको स्पष्ट संकेत पौष १६ गते देखि हुने भनिएकाे पुर्वघोषित पाटीकाे अधिवेशनबाट देखिएकाे छ। पार्टीको १५औँ महाधिवेशन कार्यतालिका अनुसार सो दिन देशभर वडा अधिवेशन हुनुपर्ने थियो। तर वास्तविकतामा कुनै पनि स्थानमा वडा अधिवेशन हुन सकेन। क्रियाशील सदस्यता वितरणमै पार्टी अड्किँदा महाधिवेशन प्रक्रिया सुरुआतमै ठप्प भएको हो।
महाधिवेशन कार्यतालिकाअनुसार पौष १६ मा वडा, पौष १७ मा गाउँ/नगर, पौष १९ मा प्रदेश सभा क्षेत्र, पौष २१ मा प्रतिनिधि सभा क्षेत्र र पौष २२ मा जिल्ला अधिवेशन सम्पन्न हुनुपर्ने थियो। तर पहिलो चरणमै अधिवेशन नै नहुँदा सम्पूर्ण तालिका अर्थहीन बनेको छ। यसले पार्टीभित्रको अव्यवस्था, गुट–उपगुटको दबाब र केन्द्रीय नेतृत्वको असफलतालाई नांगो रूपमा उजागर गरेको छ।
क्रियाशील सदस्यता वितरणलाई लिएर लामो समयदेखि विवाद चल्दै आए पनि समयमै समाधान निकाल्न नसक्नु काँग्रेस नेतृत्वको ठूलो कमजोरी हो। संगठन विस्तारभन्दा शक्ति सन्तुलनमा केन्द्रित राजनीतिले तल्लो तहका कार्यकर्तामा निराशा फैलिएको छ। अधिवेशन नै नहुँदा आन्तरिक लोकतन्त्र कागजमै सीमित भएको देखिन्छ।
यसैबीच, फागुन २१ मा घोषित प्रतिनिधि सभा सदस्य निर्वाचनले काँग्रेसको अन्योललाई अझ बढाएको छ। संगठनात्मक संरचना अधुरो, नेतृत्व चयन प्रक्रियामा अन्योल र स्पष्ट चुनावी रणनीतिबिना काँग्रेस कसरी चुनावमा जाने भन्ने प्रश्न उठेको छ। अधिवेशन बिना नै उम्मेदवार चयन हुने अवस्था आयो भने पार्टीभित्र असन्तोष झन् चर्किने निश्चित छ।
देशकै पुरानो लोकतान्त्रिक पार्टी आज आफ्नै विधान र कार्यतालिका पालना गर्न नसक्ने अवस्थामा पुग्नु गम्भीर राजनीतिक सन्देश हो। अब पनि नेतृत्वले ढिलाइ गरिरह्यो भने काँग्रेस केवल निर्वाचनमा होइन, दीर्घकालीन राजनीतिक विश्वसनीयतामा समेत कमजोर बन्ने खतरा बढ्दै गएको छ।
